club of love

للقلـــــــــــــــــــــــــــوب النابضة ,,
 
الرئيسيةس .و .جبحـثالتسجيلدخول

شاطر | 
 

 قصة واقعية من خليجنا .. قطر

اذهب الى الأسفل 
كاتب الموضوعرسالة
روح القلب

avatar

المساهمات : 685
تاريخ التسجيل : 11/06/2008
العمر : 29
الموقع : مدينه حمد

مُساهمةموضوع: قصة واقعية من خليجنا .. قطر   الأحد يوليو 13, 2008 8:46 pm

هالقصة قالتها لي بنية بحرانية ساكنه في قطر ومن كثر ما شوقتني وهي تقولها طلبت منها اني احطها بالمنتدى وهي وافقت .. والقصة مو واجد طويلة ..(طبعا الترجمة بحراني )

طبعا هالقصة واقعية في دولة من دول الخليج وهي ( قطر)
في يوم من الايام تعرفت على وحدة قطرية بيتنا خالها مأجره لينا فنقعد صوب بيتهم ، عدنا باصات مال قطر حكومية يمرون على بيت كل وحدة وياخذونها ( طبعا في البحرين يتجمعون عند المحطة وياخذنا في مرة وحدة) واني وهي ياخذنا الباص ونروح ويا بعض المدرسة وصرنا اصدقاء وكل يوم اكلمها بالتلفون وكل يوم وياي ، لكن هي شوية مغترة في بنات يمشون ويانا في الفسحة بس للاسف طلعوا يتجسسون علينا ، راحو هالبنات حق صديقتي يقولون ليها وش ليش تتعرفين على هاي اللبنية ويعقرون بس صديقتي قالت لهم لا هذي صديقتي وبتظل صديقتي الى الابد وعااد اني صدقت الكلام ، وعطيتها اسراري وعطتني اسرارها وتقول انها تحبني وما تقدر تخليني وبتوقف وياي لما نكبر ونصير ربات بيوت قلت ليها اوكي بنظل اصدقاء ، هي عاد تحب اللصبيان ، تموت في شي اسمه اصبيان ، خربتني وندمت وما كنت اعرف انها دمار ، كان صوب بيتنا ماتم كبير ( طبعا المنطقة الي قاعدين فيها كلها شيعية) في محرم كل يوم نروح مشي، عاد ابوي ما يرضى اروح مشى لازم وياي الخدامة قلت ليه اوكي ، صوب الماتم كل فيه اصبيان وصوبة دكان في بيت ، اني ما كنت ادري ان في دكان عاد ماتم النسوان صاير فوق الرجال ، والرجال تحت عاد قالت لي تعالي وياي قلت ليها وين قالت لي بنروح الحمام قلت ليها اوكي لما رحت نزلتني عند اللصبيان واني قلت ليها من سمح ليش انش توديني عند هالمصبنة قالت لي عادي وقعدت تقنع فيني لما قصت علي ، وصرنا نروح الدكان كل يوم وصارو اللصبيان ينتظرونا عاد يوم من الايام قلت ليها ما بروح وياش قالت لي ما يصير قلت ليها اوكي رحت اني ما ادري ان الدكان ضيق دخلنا ما نشوف الا شلة اصبيان داخلين ويتلصقون فينا اني خفت ، وتوني بطلع من الدكان ما اشوف الا واحد مجود ايدي سبيته سب


ونكمل القصة ..

المشكلة مو راضي يهد ايدي بعدين صديقتي قامت سحبت ايدي من عنده بعدين رحت الماتم قعدت اصيح تقول لي اشفيش تصيحين هذا الشي عادي قلت ليها جان خليتنه يجود ايديش انتين تقول لو ماسكـ يدش المفروض تستانسين ، قلت ليها انتين امش ترضى عليش تسوين جدي قالت امي ما تدري بشي لو تدري دبحتني بعدين سافر ابوي قمت اروح ويا امي الماتم شفت صديقتي بس ما عطيتها وجه الا ما اشوفها جاية لي تقول لي تعالي وياي قلت ليها ما ابغي تعبانه جودتني من ايدي وسحبتني الى تحت قلت ليها اذا ما هدتين ايدي بقول لامش (واني ما قدرت اسحب ايدي لانها متينه) وكل تقول انها مظلومة وبس انزين هذي الاجازة بعدين اني سافرت جيت البحرين وكانت كله تطرش لي رسايل بس اني ما ارد عليهاا لما رجعت الى قطر ابتدت المدرسة ورحت المدرسة وشافتني وحضنتني وسلمت عليها ولا كانه صاير شي ، بعدين لما طق جرس الهدة رحنا الباص اتاخرت الفراشة ( لان لازم تكون ويانا فراشة بالباص) قالت لي تمللت خلنا نزل من الباص نروح صوب الباب مال المدرسة قلت ليها واني بعد، ورحنا ما اشوف الا

[center]اصبي من بعيد يسوي لي حركات يعني قصده يبغي الرقم ما عطيته وجه قالت لي صديقتي فرصة قلت ليها فرصة وجهش ومشيت عنها ، قامت هي عطته وجه وهذا اللصبي جه قام جه صوب الباص يا زعم بيروح مكان ثاني وفلت عليها ورقة ومشى ، فلت الورقة صوب الرمل الهبلة راحت واخذت الورقة من الارض وهو صوبها قلت ليها صدق ما عندش كرامة قالت وهي ومستانسة واخيرا حصلت واحد قلت ليها مالت عليش قلت ليها اذا انتي صدق صديقتي فلتي الورقة قالت لي لا ، قلت ليها اوكي لا اعرفش ولا تعرفيني مشيت عنها رحت قعدت مكان ثاني الا جاية لي وعندها الورقة تقول لي انزين اني بفلت الورقة بس خاطري اقرها قلت ليها الا تبغينه سويه ما لي خص فيش وفتحت الورقة وقالت لي مكتوب فيها انتي يا الملقوفة ما ابغيش ابغي الي وياش وحاط ايميله ورقمه وحرفه وقلب قمت خذيت الورقة من ايديها بس هي ما عطتني ، قلت ليها بتصل فيه قالت تجدبين علي قلت ليها صدق بتصل لما اخذته شقتته ورميته في الزبالة وهي منصدمة كانها مو شايفة خير باقي اشوية وتصيح ، يوم ثاني قالت لي بليز عاد تعالي وياي الماتم قلت ليها لا ما ابغي قالت لي عاد عاد عاد قلت ليها بشرط ما تكون عندش هالسوالف قالت لي اوكي ،ورحنا الا تقول صديقتها الثانية وش رايكم ننزل تحت قلت ليهم روحوا ثنتنكم اني ما بروح تقول لالا ما يصير نخليش بروحش قلت ليهم عادي يقولون لا مستحيل تعالي ويانا وغصبوني وبعد قلت لا ،قامت وش سوت ..
ونكمل القصة ..

راحو نادود على شلتهم كلهم وشالوني من ايدي ونزلوني قدام الناس فشيله صار وجهي احمر لما نزلنا تحت قلت ليها بقعد صوب الباب ما ابغي اروح الدكان قالوا لي بنزعل عليش جاملتهم ، وكان شكله الماتم ما فيه اصبيان فرحت رحت الدكان كان هدووء الا البنات يقولون بس خلنا نرجع ما في احد قلت ليهم يالله بعدين صديقتي قالت امشو ناخذ لينا بيبسي قالوا يالله عااد رحنا دخلنا انصدمنا الدكان متروس شباب قلت ليهم رحوو اني بوقف بره قالوا لي اوكي على راحتش ما اشوف الا نفس اللصبي جاي ومجود ايدي مرة ثانية المشكلة محد وياه بروحه اني خفت ارتجفت خفت يسوي لي شي ، جه لي يقول اشفيهم الحبايب مو على بعضهم سكت عنه وغاورت عنه الا ما اشوفه الا يقول لا ما يصير عطينا وجه عاد اشلون كل هالحلاوة وما تعطينا وجه قلت ليه استح على وجهكـ يا قليل الادب لو انت مأدب جان ما قلت لبنات الناس جدي الا البنات توهم طالعين قلت ليهم يالله يالله بنمشى شنو هالاشكال الا اهني ما اشوفه الا رايح صوب الباب الي يطلعون منه لما وصلنا صوبه بنطلع ما رضى يخلينا واقف صوبه ما يصير ندزه قلنا ليه اتباعد قال لا قلنا اتباعد لو سمحت قال مافي ، اني بعدين عصبت قلت
[center][size=12]ليه اذا انت رجال اتباعد واتباعد طلعنا ولحق ورانا والبنات مستانسين حدهم واني امشي اول وحدة عشان نوصل ، هم يمشون على راحتهم عشان بس يتكلمون وياهم بعدين رحت بيتنا على طول وقطعت اروح الماتم ، وهي تمشي صديقتي صادها ولد عمتها وراح قال حق امه ، وامه راحت قال لام صديقتي وخلو السالفة علي اني وتتكلم وياي ولا كانه صاير شي واني كله اسئلها صار شي تقول لالا ما صار شي بعدين امها ضربتها وقالت ليها ما في طلعة من البيت وتجي لي وتتكلم عاادي قالت لي امي ضربتني قلت ليها على شنو تقول بس جدي قلت ليها ادري على شنو امش ضربتش وانتي مهما يسون فيش ما تجوزين الا تقول لي مستحيل اشوف اللصبيان يجنون ما اقدر على فراقهم قلت ليها ويع عليش ، انزين قطعنا نروح الماتم ،رحنا المدرسة وكله تاخذني عند الهدة نتمشى بره وللاسف كانت وحدة من عائلتهم تراقبنا وتروح اتعلم امها قالوا لي ربعي تركي هاللبنية ما يصير ترافقينها والمشكلة عندها ربع واجد بعدين كلمتني على النت تقول اسفة يمكن امي تروح اي وقت بيتكم وتقول لامش عن كل الي سويناه قلت ليها شنو شنو ، شنو سويت اني انتي الي كله تسوين هالحركات الي ودتش في داهية قالت لي انتي يعني ما كنتي وياي انتي وياي لا تخلين السالفة علي بس قلت ليها لا والله من الي قال لي عن سالفة الدكان من الي غصبني اروح الماتم عشانش قالت لي ما يخصني انتي وياي بالسالفة وسكرت النت بوجهي ، وما اكلمها بالتلفون صار لينا اسبوع بعد هالاسبوع ما اشوف الا احد يطق باب بيتنا رحت خليت اخوي الصغير يفتح الباب طلعت ام صديقتي وعمتها بعدين قال لي اخوي اكو نسوان ثنتين في المجلس قلت ليه اوكي بروح ليهم وانصدمت لما ..
هذا الجزء الاخير ...

[size=12]شفتهم رحت اسلم عليهم وهم يطالعوني بنظرات كاني مسوية جريمة بعدين رحت ناديت على امي ، وامي مسكينة ما تدري بشي قعدت وياهم الا امها فاتحة الموضوع تقول ترى بقول ليش عن بتش شنو تسوي من وراش وقالت كل شي وقلت ليهم بتكم هي الي خلتني اروح وياها اني ما سويت شي احنا ما نعرف شي عن قطر هي الي خربتني وخلتني اروح الدكان ، امها سكتت بعدين دورت ليها سالفة وليش ناشرة ايميل بتي قلت ليها شنو اني ولا مرة نشرت ايميل احد وهاوشتها وطلعت من بيتنا وهي وجهها احمر ومتفشلة بعدين امي عصبت علي وقالت لي هاذي التربية الي ربيتش اياها قلت ليها والله ما ادري ان اللبنية بتسوي فيني جدي وصارت امي كله تراقبني يوم ثاني اتصلت صديقتي وشالته امي قامت سكرته في وجه امي ، واليوم الي عقبه ردت اتصلت بس ما تكلمت لما سمعت صوتي متغير قامت اتكلمت وياي تقول لي شخبارش قلت ليها تمام قالت لي مبروكـ النجاح قلت ليها الله يباركـ فيش قلت ليها يالله اخليش الحين باي .. لحد الحين ما اتصلت الله يستر السنة الجاية وش بصير لان مال قطر واجد ينتقمون ..
اتمنـى انها اعجبتكم صدق قصيرة بس اني شوقتني وانتو وش رايكم فيها ؟؟
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
قصة واقعية من خليجنا .. قطر
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
club of love :: الادب -gRoUp.. :: قصص الاعضاء الواقعية ,,-
انتقل الى: